Мақала авторлары диалогтық оқытудың ерекшеліктері мен маңыздылығына тоқталып, диалогтық оқыту барысында оқытушылар мен білім алушылардың әрекеттеріне, топтық жұмыс түрлері кезінде қолданылатын әдіс-тәсілдерге талдау жасаған. «Аударма ісі» мамандығы бойынша дәріс, практикалық сабақтардағы білім алушылардың бірлескен әңгімесі, жұптық жұмыс, топтық жұмыс барысында байқалған кемшіліктер мен артықшылықтарды саралай отырып, сабақтың сәтті-сәтсіз тұстарын айқындап көрсеткен. Авторлар оқыту мен оқудағы жаңа тәсілдерді қолдана отырып, дәріс және практикалық сабақтар мазмұнына рефлексиялық талдау жасаған. Диалогтық оқытудың тиімділігін арттыру мақсатында нақты қандай әдістерді қолдану керек, сабақты жоспарлау, кері байланысты дұрыс орнату мәселелері, білім алушы мен оқытушының, білім алушы мен білім алушының арасындағы өзара диалогты жүзеге асырудың жолдары қарастырылған. Диалогтық оқыту білім алушылардың ауызекі тілін дамытуға қомақты үлес қосатын шын мәніндегі тиімді түрі болғандықтан бұл тәсіл олардың ашылуына, ойын жеткізуіне, сөздік қорының молаюына көмектесіп, диалогтық оқыту нәтижесінде білім алушының сабаққа қызығушылығы артып, өз еркімен ынталанып, жұмыс жасай және ауызекі сөйлеу дағдысының қалыптаса бастағанын байқауға болатыны мақалада баяндалады.