Географиялық білім беру жүйесін дамытудың негізгі бағыттарының бірі – ақпараттық-коммуникациялық технологияларды сабақта кеңінен қолдану. АКТ-ны қолдану оқушылар бойында ақпараттық-коммуникациялық құзыреттілікті дамытуға бағытталған. Сондықтан да қазіргі уақытта оқушылар бойында білім алу дағдыларын қалыптастыру, ақпаратты өңдеу және сыни тұрғыдан түсіну, ақпараттық-коммуникациялық технология құралдары арқылы жаңа білімді қабылдауға дайындау мәселелері өзекті. Осы тұста пән мұғалімнің міндеті – сабақтарда тақырыпқа сай бейне материалдар, бейнеүзінділер, телехабарлар, жаңа ақпараттық технологиялар негізінде жасалған бағдарламаларды күнделікті қолдану. Оларды қолдана отырып, оқушыларды шығармашылыққа баулу және пәнге деген қызығушылықтарын арттыру, сабақты жан-жақты сипаттай алатын мәліметтерді жинақтау, оқушыларды бірлескен жұптық, топтық жұмыстарға тарту секілді іс-әрекеттерді ұйымдастыра алады. Алайда жинақталған мәліметтер оқушының жас ерекшелігіне сай, нақты тақырыпты аша алатын, уақыт межесінен аспайтын, оларды жалықтырып алмайтындай болуын мұғалім тарапынан саралануы қажет.