Дене шынықтыру бағдарламасындағы «Жекпе-жек» бөлімін қамтитын күрес өнері – ұлттық салт- дәстүрге жататын, ұлттық мәдениеттің дамуымен бірге жетілген спорттық сала. Балаларды ержүректілікке, намысқойлыққа, қайраттылыққа тәрбиелейтін бұл спорт түрі мектептегі жоғары буын сыныптарына арналған. Көшпенділердің тұрмыстық, әлеуметтік өмірінде кездесетін той-томалақ, ойын-тамаша, сауық-сайран, ас беру, алуан спорттық қимылдар кезінде орындалатын дәстүрлі өнер түрі. Ептілікті, күштілікті, қайсарлықты, ерлікті шыңдайтын көне сайыстардың қайнар көзі. Күрес өнері әлем халықтарында ортақ қезігетін, тарихымен тамырлас, болмысымен біте қайнасқан ұлттық спорт. Бірақ әр елде күрестің аталуы, әдіс-тәсілдері ұқсамайды. Ол басында пайда болу, қалыптасу, өркендеу, гүлдену мен даму сатысын басып өткен байырғы төл мұрамыздың бірегей құнды мұрасы. Жаһанданған жаңа дәуірге келгенде төл күресіміздің өресін төмендетіп алмау үшін тамаша игілікті іс-шаралар қолға алынып атқарыла бастады. Қазақ елі бейбіт тәуелсіз ел болған соң қазақ күресін дамыту жолында толағай табыстарға кенелді.