Мақалада хореография өнері саласында мамандар даярлауда  кәсіби пәндерді жүргізуде хореография мамандығының ерекшелігін, дәстүр сабақтастығын сақтай отырып, оқытудың негізгі қағидалары  айқындалады. Осы мақсатқа жетуде авторлар балалар шығармашылық би ұжымындағы жетекшілік, педагог-хореограф мамандарды даярлаудағы оқытушылық және орындаушылық  тәжірибелерінің  негізінде талдап, сараптама жасайды. Жалпы педагогика және хореография өнерінің педагогикасы  саласындағы ғылыми еңбектерінің негізінде оқытудың заманауи қағидалары ұсынылып, зерттеу қорытындысы талқылауға ұсынылады.

Қазақстан хореография өнерінің әлемдік деңгейде танылуы балетмейстерлердің шығармашылығымен, орындаушылардың жоғары орындаушылық шеберлігімен қатар отандық педагог-хореографтардың баға жетпес еңбегінің жемісі. Инновациялық, технологиялық-интеграциялық үдерістің қарқынды дамыған тұсында хореография педагогикасының өзіндік спецификасы мен педагог-хореографтардың негізгі функциялары мен кәсіби қызметі ғылыми-шығармашылық тұрғыдан  зерттеуді, сауатты саралауды талап етіп отыр.