Қазіргі жаһандық экологиялық сын-қатерлер жағдайында болашақ педагогтердің кәсіби даярлығында экологиялық ойлауды қалыптастырудың маңызы артып отыр. Орта кәсіптік білім беру жүйесінде білім алушылардың экологиялық хабардарлығы мен нақты мінез-құлқы арасындағы алшақтық экологиялық білім берудің әрекетке бағытталған тиімді педагогикалық құралдарын іздеуді талап етеді.

Зерттеудің мақсаты – педагогикалық колледж студенттерінде экологиялық ойлауды дамыту құралы ретінде интеллектуалдық-проекттік қызметтің тиімділігін теориялық тұрғыдан негіздеу және эксперименттік жолмен тексеру. Зерттеу жүйелік-әрекеттік және проектке бағдарланған тәсілдерге сүйенеді, олар оқыту үдерісін когнитивтік, құндылықтық және мінез-құлықтық компоненттердің біртұтас өзара әрекеті ретінде қарастыруға мүмкіндік береді.

Зерттеу әдіснамасы 2024–2025 оқу жылында 158 педагогикалық мамандық студентінің қатысуымен жүргізілген кезең-кезеңмен ұйымдастырылған педагогикалық экспериментті қамтыды. Экологиялық ойлау деңгейін анықтау үшін сауалнама, жағдаяттық тапсырмалар және студенттік жобаларға сараптамалық бағалау қолданылды. Алынған деректер сипаттамалық статистика және Стьюденттің t-критерийі арқылы өңделді.

Зерттеу нәтижелері интеллектуалдық-проекттік бағдарламаны іске асырудан кейін студенттердің экологиялық ойлау деңгейінің статистикалық тұрғыдан сенімді артқанын көрсетті. Ең айқын өзгерістер мінез-құлықтық-рефлексивтік компонентте байқалды, бұл экологиялық білімнің жауапты әрекетке айналғанын дәлелдейді.

Зерттеудің ғылыми маңызы педагогикалық колледж студенттерінің экологиялық ойлауының құрылымын нақтылаумен және оны қалыптастырудың педагогикалық шарттарын айқындаумен байланысты. Практикалық маңызы – ұсынылған бағдарламаны қолданыстағы оқу жоспарларын өзгертпей білім беру үдерісіне енгізу мүмкіндігінде. Зерттеу болашақ педагогтерді даярлау жүйесінде экологиялық білім берудің теориясы мен практикасын дамытуға үлес қосады.