Педагогтың кәсіби қалыптасуы – көп жылдық, іс жүзінде шексіз үдеріс, ол педагогикалық қызметтің әртүрлі деңгейлері мен кезеңдерінде мақсатты құзыреттілік мазмұнымен ерекшеленеді. Осыған байланысты болашақ мұғалімнің кәсіби дайындығының мазмұнын өзектендіру және оның сапасын халықаралық сапа стандарттарына бағыттау, педагог мамандығының жоғары мәртебесін қамтамасыз ету, педагогикалық білім беруді жаңғырту маңызды.

Осы зерттеудің мақсаты – болашақ педагогтың кәсіби қалыптасуының сипаттамасына тікелей әсер ететін эмоционалдық эмпатияның ерекшеліктерін зерттеу. Болашақ педагогтың кәсіби дайындығының негізгі ерекшелігі – кәсіби маңызы бар тұлғалық қасиеттер деңгейін бағалау және арттыру бойынша жүйелі жұмыс жүргізу (эмоциялық және әлеуметтік эмпатия).

Зерттеу әдістері: И.М. Юсуповтың эмоционалдық эмпатиясын бағалау әдістемесі; А. Меграбянның эмоционалдық әсер ету шкаласы (Н. Эпштейннің бейімдеуі); В.В. Бойконың эмпатия тесті; Н.П. Фетискиннің эмоционалдық эмпатия индексі.

Зерттеу Х.А. Ясауи атындағы Халықаралық Қазақ-Түрік университеті мен академик А. Қуатбеков атындағы Халықтар достығы университетінің 3 және 4 курс бакалавриат студенттері арасындағы таңдамалы топ негізінде жүргізілді.

Нәтижесінде зерттелген көрсеткіштердің өскенін растауға болады: болашақ педагогтардың жоғары эмпатия деңгейі эмпатияға ықпал ететін ұстанымдар (3,52) және эмпатиядағы идентификация (3,45/6 балл) сияқты эмпатиялық қабілеттерімен сипатталды. Корреляциялық талдау эмоционалдық эмпатия мен эмпатиялық ұстанымдар арасындағы өзара байланыстың маңыздылығын көрсетті (статистикалық мәнділік p≤0,01). Эмпатияның интуитивті арнасы идентификация және эмоционалдық арнамен өзара байланысты екені анықталды. Сонымен қатар, эмоционалдық эмпатия мен эмпатиялық қабілеттер арасында теріс корреляция байқалды.