Аталмыш зерттеудің мақсаты семантикалық өрістердің негізінде құрылған лексикалық-семантикалық модельдердің жоғары сынып оқушыларының шет тіліндегі сөздерді меңгеруіне әсерін зерттеу болып табылады. Аталмыш зерттеуде эксперимент, модельдеу, бақылау және тестілеу сияқты эмпирикалық зерттеу әдістері қолданылды. 2021-2022 оқу жылында осы зерттеуге Астана қаласының мектеп-лицейлерінің бірінің 11-сыныбының отыз екі оқушысы қатысты. Бұл зерттеуде эксперименттік және бақылау топтарының шеттілдік сөздерді меңгеру үдерісі зерттелді. Оқушылардың сөздік қорын және лексикалық дағдыларын меңгеру туралы мәліметтер жинау үшін тесттер мен бақылау қолданылды. Екі топта оқу үдерісінде түрлі тәсілдер қолданылды. Эксперимент барысында эксперименттік топтың оқушылары жаңа шеттілдік сөздерді анықтамалар, синонимдер, антонимдер мен сөз тіркестерін қамтитын парадигматикалық және синтагматикалық қатынастар арқылы байланысқан, семантикалық өріс негізіндегі лексикалық-семантикалық модельдер арқылы оқыды, ал бақылау тобының оқушылары топтастырылмаған аудармасы бар сөз тізімдері арқылы оқыды. Зерттеу нәтижелері семантикалық өрістерге негізделген лексикалық-семантикалық модельдер арқылы сөздерді оқыту тиімдірек екенін көрсетті, өйткені модельдер сөздік қорды жақсы есте сақтауға ықпал етеді, синонимдер мен антонимдер арқылы оқушылардың сөздік қорын айтарлықтай байытады, сөздердің өзара байланысын түсінуді жақсартады және әр түрлі контексте дұрыс сөз бен сөз тіркестерін қолданып, оқушының белсенді сөздік қорын кеңейтеді.