Аталған тақырып Қазақстан этномузыкатану ғылымының өзекті мәселелер қатарына жатады. Кеңес заманында қазақ музыкасының жанрлары Ресей фольклористикасында қалыптасқан жүйе бойынша қарастырылып келді. Нәтижесінде, кейбір жанрлар қазақ музыкасының табиғатына жат келетіні байқалды.

Халық композиторларының шығармашылық бейнесіне қатысты материалдар әр түрлі еңбектерде берілген, бірақ сол жеке-дара деректерден өнер иелерінің тұлғасы туралы толыққанды түсінік алу қиын.

Алғаш рет халық музыкасының жанрлық жүйесін қазақтың дәстүрлі күнтізбесімен байланыстырып, сол арқылы өнер иелерінің шығармашыл-тұлғалық типтерін ұсынған Ә.Мұхамбетова болды. Ғалымның пікірінше, өнер иелерінің болмыс-бейнесін жүйелеу үшін олардың өмірлік ұстанымы мен шығармашылық ерекшеліктерін біртұтас қарастыру керек. Соның нәтижесінде көрнекті халық композиторларының шығармашыл-тұлғалық бейнесін жүйелік тәртіпке келтіруге болады